ছবিৰ লোকেচন চলন্ত বাছ ৷ সীমিত চৰিত্ৰ, চৰিত্ৰবোৰ বহিয়েই অাছে, মুভমেন্টৰ ঠাই নাই, গতিকে ছবিখন সংলাপ নিৰ্ভৰ হ'বলৈ বাধ্য ৷ চৰিত্ৰবোৰৰ কথা বতৰাৰ যোগেৰেই ছবিৰ কাহিনী, ঠিক কাহিনী নহয়, চৰিত্ৰবোৰৰ পৰিচয় অাৰু সমস্যা অাগবাঢ়ে, একাধিক চৰিত্ৰৰ মাজত ঘনিষ্ঠতা গঢ় লৈ উঠে ৷
ৰাস্তাত বাছত উঠে এগৰাকী বয়সিয়াল অাৰু তেওঁৰ বিবাহযোগ্যা সুন্দৰী কন্যা ৷ কন্যাৰ বিবাহৰ বাবে দৰকাৰী অৰ্থ তেওঁৰ নাই, বাছৰ যাত্ৰীৰ পৰা সহায় বিচাৰে ৷ কইনা বিচাৰি যোৱা ল'ৰাজনৰ লগতেই বিয়াৰ কথা ঠিক হয়, মহিলাগৰাকী উৎসাহী, তেওঁ জোৰ দিয়ে, কথা খাটাং কৰি তেওঁ লগত নিয়া মিঠাই সকলোকে খুৱাই দিয়ে ৷
ৰাতি হয় ৷ অান্ধাৰৰ মাজে মাজে বাছ গৈ থাকে ৷ তেনে সময়তে এটা ঘটনা ঘটে, ইমান সময়ে সৰসভাবে চলি থকা ছবিখনে অন্য এটি ৰূপ লয় ৷ দৰ্শকক অন্য এক অানন্দৰ অভিজ্ঞতা প্ৰদান কৰে ৷ এই ঘটনাটি কি কৈ দিলে ছবিখন চোৱাৰ অানন্দ নষ্ট হৈ যাব ৷
এটা সীমিত পৰিবেশ, চৰিত্ৰবোৰৰ সীমিত মুভমেন্ট - এই ধৰণৰ সীমাবদ্ধতাৰ মাজত ছবিখন গতিশীল অাৰু অানন্দপূৰ্ণ কৰি ৰখাত পৰিচালক সফল হৈছে ৷ অভিনেতাসকলৰ বিশ্বাসযোগ্য চেহেৰা অাৰু সুঅভিনয় ছবিখনৰ প্ৰাণ ৷ সংলাপ নিৰ্ভৰ ছবি হিচাপে সংলাপৰ বাণীবন্ধন অ ধিক উন্নত হোৱাটো উচিত অাছিল ৷
ছবিৰ বিবাহযোগ্য যুৱতীৰ চৰিত্ৰত অভিনয় কৰিছে অনিন্দিতা অনিয়ে ৷ তেওঁ জনপ্ৰিয় মডেল, এইখন তেওঁৰ প্ৰথম ছবি ৷ তেওঁ দিয়া লিংকৰ যোগেৰেই ছবিখন চোৱাৰ সুবিধা হ'ল ৷
