সমীৰ ৰয় | প্ৰথমে নামটোৰ লগত চিনাকি হৈছিল, তাৰপিছত ব্যক্তিজনৰ লগত | ফেচবুকত বা বাতৰি কাকতত মাজে মাজে পাওঁ চিনেমা একোখনৰ কাৰণে যোৰহাটৰ যুৱক সমীৰ ৰয়ে নিজৰ প্ৰচেষ্টাত প্ৰচাৰ চলাই আছে | তেওঁ আৰু এটা কাম কৰে- বিভিন্ন ব্যক্তিৰ স্মৰণত বা নামত বিভিন্ন গছত সুন্দৰকৈ অৰ্কিড ফুল ৰোপণ কৰে | এই দুয়োটা কামেই মোৰ মনত কৌতুহলৰ সৃষ্টি কৰিছিল | চিনেমাৰ প্ৰচাৰৰ কাৰণে প্ৰযোজকে নিজে যথেষ্ট চেষ্টা কৰে, খৰচ কৰে, তাৰ অংশ হিচাপেই সমীৰ ৰয়ক দায়িত্ব দিয়া হয় নেকি ? পিছত গম পালো কথাটো তেনে নহয় | সমীৰ ৰয়ে নিজৰ আগ্ৰহতে অসমীয়া চিনেমাক ভাল পোৱাৰ কাৰণেই অসমীয়া চিনেমাৰ প্ৰচাৰৰ কাৰণে স্বতঃস্ফূৰ্তভাৱে আগবাঢ়ি আহিছিল | সমীৰক এবাৰ গুৱাহাটীত হঠাতেই লগ পাই গ'লো | তেওঁ চিনেমাৰ প্ৰচাৰৰ কাৰণে ব্যস্ত হ'লেও নিজৰ প্ৰচাৰৰ ক্ষেত্ৰত যথেষ্ট লাজুক | যুবকজনৰ লগত চিনাকি হৈ ভাল লাগিল | পিছত তেওঁ মোৰ কিতাপ এখনৰো খুব সুন্দৰকৈ প্ৰচাৰ কৰি দিছিল | মোৰ নামত এজোপা অৰ্কিড ৰুইছিল- এই কথাটোৱে মোক কি ধৰণে স্পৰ্শ কৰি গৈছিল তাক প্ৰকাশ কৰা প্ৰায় অসম্ভৱ |
এইবাৰ প্ৰাক চিনে এৱাৰ্ডত সমীৰক বঁটা প্ৰদান কৰা হ'ল, সন্মান প্ৰদৰ্শন কৰা হ'ল অসমীয়া চিনেমাৰ প্ৰচাৰৰ কাৰণে নিৰৱ্ছিন্নভাৱে কাম কৰি যোৱাৰ কাৰণে | সমীৰ ৰয়, অভিনন্দন |
No comments:
Post a Comment